»
مشروع ملابس جاهزة

مشروع ملابس جاهزة

صناعة الملابس الجاهزة من الصناعات السهلة التي يمكنك البدء فيها بسرعة، كما ان اقامة مشروع ملابس جاهزة لا يتطلب الكثير من راسمال في حين يمكن تحقيق ارباح اسرع من الكثير من المشاريع الأخرى التي تتطلب وقتا كبيرا للبداية، وتكاليف كبيرة ورأسمال ضخم.

المساحة المطلوبة لبدء مشروع ملابس جاهزة تبدا من 100 متر مسطح او اقل، ويمكن ان تكون في اي مكان فهي صناعة غير ملوثة ولا ينتج عنها ضجيج، ولهذا قد تجد مصانع الملابس الجاهزة في وسط التجمعات السكنية بدون اي مشاكل، بل ان بعض المصانع الصغيرة موجودة بالفعل في شقق سكنية في كثير من الاحياء.

التخطيط لعمل مشروع ملابس جاهزة

قبل ان تتخذ اي خطوات فعلية في تنفيذ مشروعك يجب عليك ان تفكر بأربعة عناصر مهمة لأي مشروع ومنها مشاريع الملابس الجاهزة:

  • السوق.
  • المنتج.
  • التصنيع.
  • التسويق.

 مشروع الملابس الجاهزة وعلاقته بالسوق:

يجب عليك دراسة السوق المستهدف، وما شكل المنافسة الموجودة به وما نوعية المنافسين، وما هي عناصر قوة وضعف كل منافس منهم، وهل تجد لديك اي نقاط قوة تستطيع الاعتماد عليها للتفوق علي منافسيك؟ هل كونت تصور مبدئي لمواصفات المنتج الذي ستنتجه؟ اذا كان الامر كذلك فانتقل للخطوة التالية او اختر سوقا اخر يمكنك النجاح فيه.

انت الان حددت السوق الذي ستعمل فيه، ولديك فكرة مبدئية كيف ستنجح فيه، الان يجب عليك ان تضع تصميما للمنتج الذي ستعمل عليه، دعني اقول هنا ان هناك استراتيجيتين رئيسيين للمنافسة في صناعات الملابس الجاهزة، وهما المنافسة السعرية والمنافسة التصميمية، فإما انت تنتج ملابس جاهزة مشابهة لما ينتجه الاخرون، وتعتمد في منافستهم علي تخفيض سعرك وهذه هي الاستراتيجية الاشهر عند المصريين لكني دعني هنا اقول (واخرة المنافسة دي ايه؟ لا ارباح للشركات ولا منتجات مميزة وجيدة للمستهلك)، اما استراتيجية المنافسة الأخرى فهي المنافسة بالتصميم، حيث يجب عليك دراسة احتياجات وطلبات المستهلك وتحقيقها، وكلما كان تصميمك مميزا كلما كان بإمكانك وضع السعر الذي يرضيك.

مشروعك وتصنيع الملابس الجاهزة:

بناء علي شكل المنتج وتصميمه تبدأ في شراء الماكينات الضرورية له وهي:

  • ماكينات فرز القماش.
  • ادوات الباترون والماركر.
  • ترابيزات وماكينات فرد وقص القماش.
  • ادوات الترقيم.
  • ماكينات الخياطة.
  • مكابس ومكاوي.
  • ماكينات تطريز وطباعة.
  • تجهيزات اخري مثل ترابيزات وشماعات……

يتم تحديد طول ترابيزة القص بناء علي شكل المنتج، وعدد الترابيزات والمقصات بناء علي حجم الانتاج, ويتم اختيار ماكينات الخياطة المطلوبة للإنتاج، ويتم وضع الماكينات علي شكل خطوط (قد تكون متشعبة ولكن يظل اسمها خطوط مجازا) بحيث ان كل ماكينة تقوم بعملية واحدة لإنتاج المنتج المطلوب.

وبناء علي شكل الخطوط وحجمها يتم تحديد المساحة المطلوبة لمشروعك.

مشروعك وتسويق الملابس الجاهزة:

يمكنك ان تسوق منتجات مشروعك من خلال محلاتك الخاصة، وهنا ستحتاج الي توفير رأسمال يكفي لدفع ايجارات المحلات لأول عدة شهور، وهي الشهور التي لا تتوقع وجود مبيعات كافية به، او انك ستضطر الي الاستعانة بمحلات الاخرين، والمشكلة  في حالة الاستعانة بمحلات الاخرين انك لن تحصل علي ثمن منتجاتك فورا، بل سيكون ذلك بعد بيع المنتجات بالفعل حيث يحصل المحل علي عمولة ويعطيك الباقي، وهذا حسب الاتفاق بينكم، وفي هذه الحالة ستضطر لتوفير رأسمال مناسب يكفي لعرض منتجات مشروعك في هذه المحلات (فرش المحلات) وهي تعتبر اموالا غير مستغلة، لكنها ضرورية لتسويق منتجات مشروع الملابس الجاهزة الخاص بك، خصوصا في المراحل الاولي وحتي يعرف الناس منتجاتك.

لديك استفسارات؟ اتركها في تعليق..

الكاتب: خالد الشيخ

avatar
مصمم ازياء مصري حاصل علي درجة الدكتوراة في تصميم الازياء، واعمل مدرس (دكتور) بكلية الفنون التطبيقية- جامعة حلوان- قسم الملابس الجاهزة، اكتب هنا في موقع فاشونايد، واعتبره ساحة للحوار حول كل ما يخص تصميم وتصنيع الازياء.

155 تعليق علي الموضوع

  • حضرتك لو عايز اعمل ورشه لتصنيع التى شيرت هتتكلف كام وايه نوعية الالات واجيبها منين والخامات واجيبها منين ولو هبدا المشروع ده تى شرتات بس هيتكلف كام وممكن دخلو يبقى كام فى الشهر لو شغال كويس وشكرا.

    • علي حسب حجمها ممكن تبتدي من اول 30 الف جنيه.
      معظم الالات هتمون اوفر 4 فتلة واورليه.
      المكن من الرويعي او جسر السويس عند سكر.
      والارباح بتكون في حدود 20%

  • مهندس محمد حمدي

    لو سمحت يا دكتور لو حابب اعمل مصنع مبتديء للملابس الداخليه والجوارب من القطن الصافي فقط هيكلفني كام اجماليا وايه المكن المطلوب لو حتي هبتدي بماكينه واحده ينفع ؟
    واتمني لو ينفع اتكلم مع حضرتك فون وشكرا

    • الملابس الداخلية تتعمل بمكن الخياطة.
      الجوارب تصنع علي مكن خاص.
      حدد مجال عملك اولا. الا اذا كنت تملك راس مال كافي للعمل في مجالين مختلفين.

  • انا محتاج اخد كورسات فموضوع التصميم الملابس في حاجه ممكن ادرسها تساعدني فالمجال تصنيع الملابس محتاج اتعلم عشان ابتدي صح

  • متشكر يا دكتور خالد على المعلومات القيمة …وافر الشكر لحضرتك

  • شادى عبدالواحد حامد

    السلام عليكم
    بعد اذن حضرتك كنت عايز افتح مشغل لتصنيع الباندانة وبادي كارينا
    ايه التكلفة المطلوبة وافضل الاماكن لشراء خامات الأقمشة بافضل الاسعار
    وشكرا لحضرتكم

    • تكلفة مقص ومكنة اورليه ومكنة اوفر 4 فتلة حوالي 10,000 جنيه مصري.
      بالاضافة الي تكلفة المكان واجور العمال والقماش.
      القماش تشتريه من جمال عبد الناصر في جسر السويس او من شبرا الخيمة، وغيرها مصانع كتير لانتاج التريكو البراسولا.

      • شادى عبدالواحد حامد

        لو سمحت يا دكتور خالد
        انا ف بدايتي لافتتاح مشغل زي مابعت لحضرتك بندانة وبادي كارينا
        كنت عايز استفسر عن افضل انواع الأقمشة للتصنيع والكمية اللي ممكن ابدا بيها وراس المال المناسب لغاية ما ابدا تسويق منتجات المشغل ان شاء الله
        ربنا يبارك في حضرتك

        • البندانة بتتعمل من قماش براسولا (سنجل جرسيه) سواء فيها ليكرا او لا حسب طلب السوق.
          واكيد الكميات بتكون قليلة (كتير منهم بيشتغلوا ببواقي المصانع).
          وممكن تبدأي من اول 30 الف.

  • سؤال صغير يا دكتور
    أماكن تصنيع تي شيرتات برسولا بس كميات صغير
    وشكرا علي مجهودك الرائع

  • لو سمحت عاوز اعرف معلومات اكتر عن تصنع التى شيرت الرجالى
    ١_الخامة او نوع الاقمشة المختلفة المستخدمة والسعر اذا امكن .. ٢_انواع المكن المستخدم
    ٣_انواع الخيوط ٤_الطباعة المناسبة لكل نوع

    • التي شيرت في الغالب يصنع من قماش السينجل جيرسيه (براسولا) وخياطته بتكون علي مكن اوفر 4 فتلة واورليه، وبيطبع ترانسفير او سلك سكرين.

  • السلام عليكم انا ببدء بإنشاء مصنع ملابس في منطقة برج العرب الصناعية انا خلصت السجل التجاري و البطاقة الضريبية و الرخصة و جاري عمل المباني و شراء الماكينات و احتاج مساعدة في التالي :
    1- افضل ماكينات لمنصع ملابس جاهزة رجالي أو حريمي ؟
    2- هل في شركات لتجهيز المصانع ؟
    3- أفضل موردي الأقمشة ؟
    4-انا طالب موظفين في كل المجالات مهندسين و فنين و عمال و سكرتارية و عامل إعلان فلو حد حابب يقدم يتفضل ده ايميلي :
    [email protected]
    أرجو التواصل و تبادل الخبرات مع جزيل الشكر
    م.أحمد فاضل

    • حاليا افضل مكن في السنجل هو سانسير صيني و في الاوفر والاورليه هو سيروبا تايواني
      يوجد شركات طبعا لتجهيز المصانع اشهرها جوكي في شارع شهاب، ولو تستني معرض المكن هيكون افضل بس هو بيكون اخر السنة.
      في الازهر هتلاقي موردين كتير اتعامل معاهم واختار اللي يناسبك.

  • بعد اذن حضرتك يا استاذ خالد انا لسه جديد في المشروع ده وعندي افكار في التصميمات والتسويق بس عندي مشكله البدايه زي مثلا الورش اللي هعمل شغلي عندها وده يعتبر حاجه كبيره موقفاني عن تنفيذ المشروع ده. ياريت حضرتك لو عندك اي خلفيه عن الموضوع ده تساعدني وجزاك الله كل خير

  • السلامه عليكم يا دكتور خالد عندي استفسار بعد ازنك انا بحاول اعمل مشروع تصنيع ملابس حريمي اللي هو انا هجيب القماش وهودي اي مصنع وابيع انا منهم جنله وقطاعي بس انا عايز اعرف ايه الموديلات اللي ممكن اعمله و تمشي معايا فالسوق وايه نوع القماش بتاعه وممكن يكلفني قد ايه .وشكرا لحضرتك

    • سؤالك عام جدا…
      اولا مجالات العمل في ملابس السيدات كثيرة جدا هل تقصد البلوزة ام الجيبة ام الفستان…. العباية…. ملابس كاجوال وغيرها كثير.
      ثانيا ماذا تقصد بالموديلات؟ في صناع الملابس توجد ملايين من التصميمات وكل مصنع او محل يبيع الموديلات التي يراها جيدة وتناسب “سوقه” الذي يعمل فيه.

  • لو سمحت انا عاوزة اعمل مصنع صغير للملابس الحريمى بس انا معنديش اى خبره وعايزة اعرف كل حاجه تخلينى ازاى اعملوا زى انواع الماكينات وكام واجيب القماش نوع ايه ومنين والتصميم منين ومين يعملها وكل حاجه بعد اذنك وشكرا

اترك تعليقك

يرجي الالتزام بالاداب العامة عند كتابة التعليق
التعليقات المخالفة والتعليقات التي ليس لها علاقة بموضوع المقالة يتم حذفها.
بريدك الالكتروني لن ينشر
التعليقات تراجع اولا قبل عرضها
البيانات المطلوبة مشار اليها بـ *

*