الدراسة في كلية الفنون التطبيقية
في هذا الوقت من العام تبدأ الاسئلة عن كلية الفنون التطبيقية وايه الفرق بينها وبين الكليات التانية، والسبب ان في شهر أغسطس كالعادة تبدأ موسم هجرة طيور الثانوية العامة من المناطق الحارة في التربية والتعليم الي المناطق الملتهبة في الجامعات، وبعض هذه الطيور بيكون عنده ميول فنية ورغبات او مهارات في الرسم والتلوين ونفسه يدرس في كلية من كليات الفنون بس بيكون محتار يختار كلية ايه؟!
المشكلة الأكبر كمان ان بعض الطلبة الأكبر منه بيقولو معلومات غلط وفعلا ممكن يضيعوا مستقبل طالب لانه اعتمد على كلام مش مظبوط، سمعه من طالب مش فاهم بيردد الكلام وخلاص، او طالب مش كويس عايز يغرقه في حتة مش مناسبة لامكانياته…
كليات الفنون في مصر 4 كليات، كلهم بيشتركوا في نقابة الفنوووون التشكييييلية، يعني الطالب بيتخرج منها فنان تشيكلي، في منهم كليات تربية وخريج كليات تربية اكيد اكيد يعني انه بيشتغل مدرس مش مصمم.
كلية الفنون التطبيقية هي الكلية الوحييييدة في مصر اللي خريجها بيكون عضو في نقابة مصممي الفنون التطبيقية، وهيا دي النقابة الوحيدة في مصر الخاصة بالمصممين، لان مش منطقي ان كل الكليات تشتغل في كل التخصصات، ومش علشان حضرتك اشتريت لاب توب تبقي محاسب، ومش معني انك بتعرف تسطب وينودز تبقي مهندس أي تي، كفاكم عبثا فقد وصلنا الي القاع.
تصميم يعني الفنون التطبيقية
علشان كده لو انت طالب ثانوية عامة ونفسك تشتغل في مجال التصميم يبقي تروح علي فنون تطبيقية، ولو حد وقفك في السكة وقالك ان كلية ممكن تدخل كلية كذا وتبقي مصمم، اسأله: هل خريج الكلية عضو نقابة المصممين؟ لما يقولك لأ اديله بظهر ايدك وسيبه وامشي، هايمسك فيك ويقولك اصل احنا بنعرف نرسم بردو، اديله بظهر ايدك التانية وقوله التصميم مش رسم، رسم الاسكتش ده مجرد تخطيط للفكرة علي الورق، ومحدش ابدا بيشتري اسكتش تصميم الناس بتشتري الحاجة متنفذة، مثلا في ديكور، الناس بتستلم الديكور متنفذ علي الواقع، مش اسكتش، يعني الاكتش ده جزء من التصميم، لكن فاضل مواضيع تكنولوجية وتنفيذية، وكمان مواضيع إدارية وتسويقية، وحسابات تكاليف ومراحل انتاج وتشغيل وليلة كبيرة ساعدتك، لو الموضوع مجرد اسكتش مكنش حد غلب.
هيمسك فيك بايديه الاتنين ويقولك محدش في مصر بيشتغل بشهادته، اديله بالشلوت وقوله وانا ايه يخليني اضيع 5 سنين من عمري في حاجة انا مش محتاجها، واتخرج اشغل في تخصص تاني. ومش معني ان فيه ناس مش مصممين شغالين في التصميم انهم أحسن من خريج الكلية اللي درس في التخصص 5 سنين علي ايد أساتذة متخصصين.
متسمعش كلام حد يقولك الخريج عندنا نينجا
كطالب ثانوية عامة بتدور علي تخصص بتحبه تخرج تكمل فيه طول عمرك، اوعي تصدق حد يقولك الكلية دي بتاعت كل حاجة، التخصص ده ممكن يشتغل 50 الف شغلانة، الخريج بيبقي نينجا وجناحات وبيتشقلب ويطلع نار من بقه، قاعدة عامة مفيهاش نقاش، لو بتحاول تكون كل حاجة عمرك ما هتكون أي حاجة منهم، ركز في تخصص علشان تبقي متميز فيه وتنجح، وطالما في حد بيقول ان تخصصه ممكن يشتغل في تخصص تاني، يبقي بدون نقاش التخصص ده مالوش سوق، لو كان ليه سوق مكانش وقف يشحت من التخصصات التانية.
ليه بقي الناس في الكليات التانية نفسهم يكونو مصممين؟
لان فيه تخصصات مش مطلوبة في السوق حاليا، بس دي مش مشكلتنا!! وكمان لان خريجين فنون تطبيقية قليليييين ومش مكفيين الوظايف، أصحاب الشركات والمديرين في المصانع والشركات بتشغل أي حد بيعرف يمسك قلم او فرشة ويرسم، مش لاقي حد يشغله في التخصص ده، بس بيشتغل بمرتب علي اده لحد ما يتعلم ويفهم التخصص، لكن لما بيكون أصلا متخرج فاهم المرتب بيفرق من اول يوم.
انا مش ضد كلية بعينها ومش ضد تخصص بعينه، بس لو انت بتحب الفن من اجل الفن يبقي ركز في التخصص ده، ولو انت بتحب تدريس الفن يبقي تدخل كلية تربية، اوعي تدخل فنون تطبيقية دي مش بتاعتك.
لكن لو عايز تدرس الفن من اجل التصميم وتتخرج تشتغل مصمم يبقي اكيد اكيد وبدون نقاش تدخل فنون تطبيقية.
الفنون التطبيقية فيها 14 تخصص
في فنون تطبيقية حلوان، اول واكبر فنون تطبيقية في مصر هتلاقي 14 تخصص، في كل تخصص منهم هتلاقي اتجاهين و 4 مجالات مهمين اوي ومهم تفهمهم كويس جدا.
فيه الاتجاه الفردي والاتجاه الكمي، يعني ايه؟ يعني ممكن تصمم سرير قطعة واحدة فريدة، ممكن تصميم فستان مفيش منه غير قطعة واحدة بس، تعمل فازة او نجفة قطعة زي نجفة كريستال عصفور اللي دخل موسوعة جينز، هيا واحدة فقط لا غير، لكن ممكن تكون كمان بتصمم انتاج كمي في المصانع، دولاب بيتعمل منه 10 الاف قطعة، بنطلون معمول منه 100 الف قطعة، نجفة اتصنعت بكميات وبتتباع في شارع عبد العزيز أي حد ممكن يشتريها.
التصميم في الفنون التطبيقية مش رسم
اما الـ 3 مجالات فهم التصميم، والتكنولوجيا، والإدارة. التصميم فيه مواضيع كتييير منها موضوع صغنون كده اسمه رسم التصميم، لكن في مواضيع تانية كتييير، زي تطوير المنتجات، والتفكير الابتكاري، والرسوم التنفيذية والتخطيطية، اما التكنولوجيا فهتدرس فيها مواد خاصة بالخامات وتشكيلها وقوالبها، وتكنولوجيا تنفيذها، اما الإدارة فهتدرس فيها علي سبيل المثال إدارة وتخطيط الإنتاج والجودة وتسويق المنتجات.
تخصصات الفنون التطبيقية
انا مش هقدر أتكلم عن الـ 14 تخصص مرة واحدة علشان كده هختار 7 تخصصات أتكلم عنيهم دلوقتي وممكن اكمل باقي التخصصات بعدين.
موضة وملابس
فاشون وملابس فدول الدلع كله، تصميم الأزياء والموضة والملابس وانتاجها وتشغيلها وادارتها من اول ما كانت خامة (قماش او جلد او حتي فرو) لحد ما بقت ملابس لا وكمان بيكملوا في المحلات ازاي تتعرض وازاي تتباع وازاي تتعرض في الديفيليهات.
بعض المغيبين ميعرفش خريج القسم ده بيشتغل بكام وفين، ولا يعرف كام منطقة صناعية في مصر فيها مصنع بينتج ويصدر الشغل بتاعه ومش بيبيع منه شرااااب واحد في مصر، هما مش بيقبضوا بالدولار لكن اللي فاهم فيهم تصميم او انتاج او ادرة وتسويق بيشتغل حلو، ومعلش شيل ايدك من علي ازاز العربية علشان لسه ماسحه، في أي مصنع ملابس او اتيليه او مصنع تصدير او محل او براند او شركة ملابس او أزياء هتلاقي خريجين القسم ده موجودين.
عاش يا ترزية تطبيقية
التصميم الداخلي والاثاث
الديكو ده القسم اللي بيصمم داخل المنشأت، المنشأت دي ممكن تكون منازل سكنية او مكاتب إدارية او محلات تجارية او فنادق ساحلية او أي مبني وفيه جوة مساحة تجيب بتاع ديكور يصمم ليك المكان من اول طوب احمر لحد ما يكون جاهز للاستخدام علي المفتاح يعني. وخريج تاني من نفس القسم ممكن يصمم لك الأثاث الموجود في المكان ده.
تخيل ان صعب جداااا تلاقي واحد بيصمم داخلي واثاث الاتنين رغم انهم نفس بيتخرجوا من نفس القسم، ويجي واحد مغيب يقولك احنا بنصمم أزياء وديكور وجرافيك وغزل البنات ورز بلبن كله كله في طلعة واحدة، يا راجل ده رونالدو معملهاش.
مصمم الأثاث بقي هو اللي بيصمم كل الأثاث داخل الشقة من اول الانتريه والصالون “والنيييش” ودولاب والسرير وكل حاجة، ده في المنزل السكني، لكنه بردوب يصمم الأثاث في المحلات التجارية والمكاتب واي اثاث في أي حتة فيكي يا جمهورية.
عاش يا نقاشين ونجارين تطبيقية
قسم الزجاج
ده بقي الروقااان كله، أي حاجة في ازاز يبقي زجاج وش، واجهات معمارية، وحدات اضاءة، زجاج معشق، تكسيات المزايكو، الاطباق والكوبايات الاركوبال، شغل الكريستال… باختصار أي زجاج في أي حتة يبقي بتاع القسم ده. تصميم وشتغيل وإنتاج وتنفيذ وإدارة وتسويق واي حاجة خاصة بالزجاج تتخيلها عندهم أي مصنع زجاج هتلاقيهم هناك.
لا هو غويط ولا هو مسطح، لا هو مصنفر ولا هو بيلمع
الطباعة والتغليف
الناس دي حرفيا بتشتغل أي حاجة فيها ورق او مفيهاش كمان، كل الكتب والمجلات والفلاير والمطبوعات بتاعتهم، كل النشر الورقي وكمان نشر الكتب الالكترونية عندهم، وكل ما يخص تغليف المنتجات شغالين فيه، باختصار لو عايز تشتغل أي حاجة فيها ورق يبقي تروح لهم وانت مغمض، أي مطبعة فيكي يا مصر لحد مطبعة البنك المركزي، واي حاجة بتتغلف هو اللي بيصمم العبوة بتاعتها.
عاش يا مصوراتية بلدنا.
فوتوغرافيا وسينما وتليفزيون
ده القسم اللي بيتعامل مع الكاميرا، سواء بتتكلم عن صورة فوتوغرافية او فيلم فيديو في السينما او المسلسلات او حتي لو بتصور برنامج في استوديو او في الشارع، طالما ماسك كاميرا يبقي انت محتاج خريج قسم سينما سواء بتصور فوتو او بتصور فيديو في فيلم او مسلسل او برنامج تليفزيوني جوة او برة الاستوديو الناس دي موجودة.
قسم النسيج
دول بقي المهندسين عضو نقابة المهندسين وش، وعضو نقابة مصممين، يعني مهندس مصمم ومحدش مالي عينه، بيصمم وينفذ القماش من اول ما كان مجرد شعرة لحد ما بقي خيط وبعدين قماش، ومش شرط قماش يتلبس بس، لا ده بيعمل أي قماش في الدنيا، يا راجل دول بيعملوا قسطرة قلب منسوجة دلوقتي، وبيعملوا قماش يبطنوا بيه سواحل البحر وجوانب الترع اه والله زمبئولك كده، هتلاقيهم في كل مصانع الغزل والنسيج والتريكو ماسكين وظايف التصميم والإنتاج والادارة.
عاش يا هندسة.
التصميم الصناعي
اخر حاجة علشان تعبت قسم التصميم الصناعي، شوف الناس دي بتحب تشتغل في أي جهاز ادامها، خلاط غسالة مكنسة كهربائية، تليفزيون او لعبة أطفال، ده الطلبة هناك بتعمل تصميمات للقطارات والسيارات الكهربائية، مجالهم حلو وبيشتغلوا كتير في مصانع الأجهزة الكهربائية.
كلية الفنون التطبيقية هي الكلية اللي بتخرج مصمم، مش رسام، ولو انت نفسك تكون مصمم بجد وتدرس في كلية متخصصة ومتضيعش وقت يبقي ركز في اختيارك وادخل التخصص المناسب ليك، واتخرج جاهز لسوق العمل مباشرة.
المواضيع المشابهة »»
الكاتب: خالد الشيخ
تواصل معنا...
