مشروع ملابس جاهزة

مشروع ملابس جاهزة

اقامة مشروع ملابس جاهزة لا يتطلب الكثير من راس المال في حين يمكن البدء في تحقيق الارباح اسرع مقارنة بالكثير من المشاريع الأخرى التي تتطلب وقتا كبيرا للبداية، وتكاليف كبيرة ورأسمال ضخم.

المساحة المطلوبة لبدء مشروع ملابس جاهزة تبدا من 100 متر مسطح او اقل، ويمكن ان تكون في اي مكان فهي صناعة غير ملوثة ولا ينتج عنها ضجيج، ولهذا قد تجد مصانع الملابس الجاهزة في وسط التجمعات السكنية بدون اي مشاكل، بل ان بعض المصانع الصغيرة موجودة بالفعل في شقق سكنية في كثير من الاحياء.

التخطيط لعمل مشروع ملابس جاهزة

قبل ان تتخذ اي خطوات فعلية في تنفيذ مشروعك يجب عليك ان تفكر بأربعة عناصر مهمة لأي مشروع ومنها مشاريع الملابس الجاهزة:

  • السوق.
  • المنتج.
  • التصنيع.
  • التسويق.

 مشروع الملابس والسوق:

يجب عليك دراسة السوق المستهدف، وما شكل المنافسة الموجودة به وما نوعية المنافسين، وما هي عناصر قوة وضعف كل منافس منهم، وهل تجد لديك اي نقاط قوة تستطيع الاعتماد عليها للتفوق علي منافسيك؟ هل كونت تصور مبدئي لمواصفات المنتج الذي ستنتجه؟ اذا كان الامر كذلك فانتقل للخطوة التالية او اختر سوقا اخر يمكنك النجاح فيه.

انت الان حددت السوق الذي ستعمل فيه، ولديك فكرة مبدئية كيف ستنجح فيه، الان يجب عليك ان تضع تصميما للمنتج الذي ستعمل عليه، دعني اقول هنا ان هناك استراتيجيتين رئيسيين للمنافسة في صناعات الملابس الجاهزة، وهما المنافسة السعرية والمنافسة التصميمية، فإما انت تنتج ملابس جاهزة مشابهة لما ينتجه الاخرون، وتعتمد في منافستهم علي تخفيض سعرك وهذه هي الاستراتيجية الاشهر عند المصريين لكني دعني هنا اقول (واخرة المنافسة دي ايه؟ لا ارباح للشركات ولا منتجات مميزة وجيدة للمستهلك)، اما استراتيجية المنافسة الأخرى فهي المنافسة بالتصميم، حيث يجب عليك دراسة احتياجات وطلبات المستهلك وتحقيقها، وكلما كان تصميمك مميزا كلما كان بإمكانك وضع السعر الذي يرضيك.

تصنيع الملابس الجاهزة:

بناء علي شكل المنتج وتصميمه تبدأ في شراء الماكينات الضرورية له وهي:

  • ماكينات فرز القماش.
  • ادوات الباترون والماركر.
  • ترابيزات وماكينات فرد وقص القماش.
  • ادوات الترقيم.
  • ماكينات الخياطة.
  • مكابس ومكاوي.
  • ماكينات تطريز وطباعة.
  • تجهيزات اخري مثل ترابيزات وشماعات……

يتم تحديد طول ترابيزة القص بناء علي شكل المنتج، وعدد الترابيزات والمقصات بناء علي حجم الانتاج, ويتم اختيار ماكينات الخياطة المطلوبة للإنتاج، ويتم وضع الماكينات علي شكل خطوط (قد تكون متشعبة ولكن يظل اسمها خطوط مجازا) بحيث ان كل ماكينة تقوم بعملية واحدة لإنتاج المنتج المطلوب.

وبناء علي شكل الخطوط وحجمها يتم تحديد المساحة المطلوبة لمشروعك.

تسويق الملابس:

يمكنك ان تسوق منتجات مشروعك من خلال محلاتك الخاصة، وهنا ستحتاج الي توفير رأسمال يكفي لدفع ايجارات المحلات لأول عدة شهور، وهي الشهور التي لا تتوقع وجود مبيعات كافية به، او انك ستضطر الي الاستعانة بمحلات الاخرين، والمشكلة  في حالة الاستعانة بمحلات الاخرين انك لن تحصل علي ثمن منتجاتك فورا، بل سيكون ذلك بعد بيع المنتجات بالفعل حيث يحصل المحل علي عمولة ويعطيك الباقي، وهذا حسب الاتفاق بينكم، وفي هذه الحالة ستضطر لتوفير رأسمال مناسب يكفي لعرض منتجات مشروعك في هذه المحلات (فرش المحلات) وهي تعتبر اموالا غير مستغلة، لكنها ضرورية لتسويق منتجات مشروع الملابس الجاهزة الخاص بك، خصوصا في المراحل الاولي وحتي يعرف الناس منتجاتك.

لديك استفسارات؟ اتركها في تعليق..

الكاتب: خالد الشيخ

avatar
مصمم ازياء مصري حاصل علي درجة الدكتوراة في تصميم الازياء، واعمل مدرس (دكتور) بكلية الفنون التطبيقية- جامعة حلوان- قسم الملابس، اكتب هنا في موقع فاشونايد، واعتبره ساحة للحوار المتبادل مع المهتمين بهذه الصناعة حول كل ما يخص تصميم وتصنيع الملابس والازياء.
184 تعليق علي الموضوع
  1. يقول مها صلاح:

    السلام عليكم ورحمه الله اشكرك يا استاذ خالد علي مجهودك ووقتك وجزاك الله عنا كل خير بعد اذنك عايزه اعمل ورشه ملابس اطفال خروج من عمر 3شهور حتي 12 سنه وعندي تصميماتي الخاصه بتفاصيلها وكنت محتاجه اعرف لو امكن تساعدني ابتديها ازاي يعني اي انواع المكن اللي هحتاجه وعدده واسعار اجور العمال وكام مكنه قص والانتاج اليومي بيتقسم ازاي وانا بعرف افرق بين القماش يعني اي اللي ينفع الموديل ده واي مينفعوش بس معرفش اسماء القماش انا اسفه اسالتي كتير بس اتمني انك تساعدني اعمل المشروع ده. وجزاك الله خيرا

    1. يقول خالد الشيخ:

      اغلب الاسئلة لا يمكنني الاجابة عليه لان المكن يتحدد نوعه علي اساس طبيعة التصميمات ونوع القماش، وعدد الماكينات يتحدد علي رأس المال المتاح.
      في البداية حددي طبيعة التصميم والمنتج، هل هو تريكو اذن تحتاجين مكن اوفر 4 فتلة (2500 جنيه) ومكن اورليه (>7000جنيه)، ام هو فستان وبنطلون اذن تحتاجين مكن سنجل (2000 جنيه) ومكن اوفر (2500 جنيه).
      وبالطبع في البداية تحتاجين مقص واحد (1500 جنيه).
      ملحوظة: كل الارقام تقريبية وتتغير سريعا.

  2. يقول om yassin:

    لو سمحت يا دكتور انا باذن الله ناويه افتح مصنع صغير بس طبعا معنديش خبرة
    وهبدا فى صناعه التيشيرتات….. فمممكن اعرف الماكينات اللازم اجيبها هى ايه …. و تقريبا كده قد ايه قماش و نوعه ايه
    و معلش كمان انا سمعت عن انواع ماكينات فكنت عاوزة اعرف الجاك ولا brother ولا صن سير احسن
    و معلش كمان اجيب مكن الاوفر كام فتله

    1. يقول خالد الشيخ:

      مكن التي شيرت الاساسي هو الاوفر 4 فتلة والاورليه باشكاله مثل الشريط والرش.
      بالنسبة لكمية القماش علي حسب راسمالك، وانواعه علي حسب منتجاتك:
      البراسولا للتي شيرت العادي، الميلتون والبيكيه للتي شيرت التقيل ويوجد غيرها كثير.
      حاليا كل المكن في مصر صيني وكثير من الصنايعية يفضلون صن سير.
      انصحك ايضا بالبحث عن مكنة كولكس استاذ محمد: 01069454904
      هي مكنة مصرية لكن يقولون ان جودتها افضل من الصيني.

  3. يقول هاله عبد المنعم:

    استاذ خالد .. انا درست ف مدرسه ثانوي صناعي قسم ملابس جاهزه وحابه اكمل ف المجال بس مجموعي مجبش كليه اقتصاد منزلي .. وبفكر اخد كورسات وابدأ من الصفر وطموحي اني ابقي مصممه ازياء مشهوره ويبقي ليا كياني … عايزه رأيك ف اذا كان الموضوع سهل ولا لاء عليا .. لاني هبقي مش معايا شهاده جامعيه .. وتاني حاجه لما اخلص كورسات بأذن الله .. ايه اول حاجه مفروض اعملها ف طريق نجاحي ..وشكرا

    1. يقول خالد الشيخ:

      لو عندك افكار جديدة وجيدة يبقي الموضوع سهل.
      بالنسبة لاهمية الشهادة في مجال الازياء فاهم حاجة هو الشغل نفسه.
      وطبعا اهم حاجة للنجاح هي انك تاخدي خطوة يعني تبتدي تنفذي افكارك.

  4. يقول فهد بن اسماعيل:

    السلام عليكم ورحمة الله وبركاته
    اريد فتح مصنع لملابس الاطفال الداخلية والخارجية فكم تكلفة خط انتاج الملابس الداخلية وخط الخارجية من حيث الادوات المطلوبة لاقامة المشروع وجزاك الله كل خير

    1. يقول خالد الشيخ:

      خطوط الانتاج تختلف من منتج لاخر وكذلك الاسعار.
      انصحك بالذهاب الي توكيل ماكينات جوكي في اول شارع شهاب من جهة جامعة الدول.

  5. يقول احمد طلعت:

    استاذ خالد عندى سؤالين .. ايه الافضل استيراد ملابس جاهزة من الصين او انى اجيب قماش و اخلى مصنع يعمله ( الافضلية من ناحية الربح ) ؟

    تانى سؤال .. انا ناوى اشتغل فى صناعة و تسويق السويت شيرت و الهودي الرجالى , ايه نوعيه القماش اللى انزل اجيبه و فين الاقيه بجودة و اسعار كويسة .

    و شكرآ

    1. يقول خالد الشيخ:

      التشغيل في الصين مريح في المتابعة، التشغيل في مصر ارخص في التكلفة خصوصا مع تغير سعر العملات حاليا.
      التي شيرت بيتصنع من قماش سنجل جيرسيه (براسولا) والهودي بيتصنع من ميلتون او بيكيه علي حسب التصميم، وتلاقيهم في التربيعة-الازهر او في شارع جمال عبد الناصر- السلام.

  6. يقول علاء فتجى:

    السلام عليكم لو سمحت ي دكتور انا مهندس ميكانيكا قوى وكنت حابب اعمل مشروع ملابس حريمى وانا من البحيره وعوز اركز على العبايات الحريمى والملابس الداخليه . لو حبيت اعمل خطين انتاج الخط الواحد تكلفته فى حدود كام انا بتكلم على اسعار المكن . وشكراً لحضراتك وسعة صدرك

    1. يقول خالد الشيخ:

      اسعار المكن دلوقتي تبدأ من 2000 جنيه لمكنة السنجل (الخياطة العادية) و3200 لمكنة الاوفر، والاورليه حوالي 5500 جنيه.
      تكلفة الخط كله تختلف حسب شكل المنتج وبالتالي عدد المكن في الخطـ لكن مبدئيا ممكن تحسب التي شيرت 12 مكنة (8 اوفر و4 اورليه)، وتحسب العباية 6 مكنات (5 سنجل ومكنة اوفر).

  7. يقول الاء طاهر:

    السلام عليكم دكتور خالد انا عايزه يكون عندي مصنع وانتج الموديلات اللي تعجبني بس مش عايزه اجازف باني اعمل مصنع فكنت بفكر اني اجيب الموديلات اللي انا عيزه ابيعها واجيب القماش واختار مصنع ينتجلي ولو شغلي اتباع بنجاح ابتدي انا اعمل مصنع واشتغل لحسابي فايه راي حضرتك كفكره مبدئيه وهل التكلفه في الحاله ده هتكون اقل من اني ابدا بمصنع يكون ملكي

    1. يقول خالد الشيخ:

      طبعا تكاليف بداية المشروع هتقل. لكن تكلفة القطعة الواحدة هتزيد، مش مهم الزيادة لحد ما تتطمني لنجاح المشروع.
      اهم حاجة حاولي تشغلي حاجتك عند شحص امين، لان وارد جدا انه يضرب موديلاتك يعني ينتجها ويبيعها لحسابه.

  8. يقول احمد بكر:

    انا احمد من مصرترزي واعمل بمصانع ملابس جاهزة مثل التي شيرت والبنطلون الشبابي وغيرها واريد ان اقوم بهذا المشروع الصغير للملابس ومن اين احصل علي قماش المصانع وكيف اقوم بتوزيع منتجي

    1. يقول خالد الشيخ:

      الاقمشة القطن موجودة في التربيعة- الازهر، ويمكن التوزيع علي محلات الملابس الرجالي في منطقتك.

  9. يقول محمود:

    حضرتك سؤال ماهى الماكينات المطلوبة لتشيرتات رجالى

    1. يقول خالد الشيخ:

      مكنة الاوفر 4 فتلة للتجميع (خياطات)
      مكنة اورليه لثني النهايات في الكم والبدن
      مكنة شريط لتركيب شريط الرقبة
      مكنة سنجر لتركيب التكت والهانج تاج

  10. يقول نهاد:

    بشتغل من 10 سنين عندي 30 سنه …تعبت من القطاع الخاص اشتغلت في التجارة ومحاسبة ومدربة جيم عليشه في محافظة صغيرة المجال مش مفتوح ….قررت افتح مشروع وهوا صناعة التيشيرت بس لما سالت في الموضوع ناس كتير احبطوني وشايفين ان كتير عامل الموضوع ده واني هتاجر في حاجة خسرانة

    1. يقول خالد الشيخ:

      عمر ما صناعة التي شيرت هتقف…. هيفضل مطلوب لانه قطعة ملابس اساسية.
      لكن عيب التي شيرت ان مكسبه قليل لانه منتج بسيط.
      انصحك انك تشتغلي علي حسب طبيعة المحافظة ومستوي المهارات فيها.
      بعض مناطق الصعيد فيها خامات ممتازة زي التلي والملس… ممكن تطعمي منهم حاجات مودرن وتبيعيها في محافظة تانية “القاهرة” وتكسبي كويس.
      مناطق مطروح والواحات فيها تطريز ممتاز جدا، ومناطق سينا فيها تطريز جميل جدا بردو.
      كل منطقة مهما كانت بسيطة هتلاقي فيها ميزة، ولو مفيش مميزات خالص فده بردو في حد ذاته ميزة، لان اجور العمال هتكون قليلة جدا مقارنة بمناطق تانية، المشكلة انك هتحتاجي شوية وقت علي ما تدربيهم.
      لو مفيش مهارات خالص ابدئي بتي شيرت علشان متتعبيش اوي مع العمال.

اترك تعليقاً

لن يتم نشر عنوان بريدك الإلكتروني.

اعجبك الموقع؟

صفحتنا علي فيسبوك

تواصل معنا...

هل تبحث عن موضوع معين؟

اعضاء فاشونايد