انشاء براند ملابس

انشاء براند ملابس

براند ملابسفي التسويق يعتبر كل براند ملابس (العلامة التجارية) وسيلة للتعرف علي المنتج وتمييزه وسط باقي المنتجات الموجودة في السوق، بحيث يمكن للمتسوق ان يتوقع مستوي معين من الجودة عند شراء المنتجات التي تعمل هذه العلامة التجارية (البراند) وكذلك مستوي الأسعار وشكل التلبيس، بالإضافة الي توقع وصول المنتجات التي تتماشي مع الموضة عند بعض العلامات التجارية قبل غيرها.

وابسط شكل لإنشاء العلامة التجارية في مجال الملابس (او غيره) يكون بتمييز المنتج او البائع عن المنافسين بأي طريقة، سواء طريقة التغليف او مكان البيع، لكن الأسلوب الأقوى في انشاء العلامات التجارية يكون من خلال وضع تيكت العلامة التجارية على قطع الملابس نفسها مع مراعاة بعض النقاط التي يجب مراعاتها اولا.

اختيار اسم براند ملابس مناسب

وجود التيكت على قطع الملابس يضمن تعرف المتسوق على البراند وتمييزه بين المنافسين، لكن يجب الا يكون هذا التيكت هو نفسه تقليد لبراند اخر، او وجود تشابه بينهما، كما لا يجب ان يكون اسم البراند يحمل أي معاني سلبية تضر المنتج (ولو ان كل شيء في مصر ممكن، بعض أسماء المحلات خصوصا محلات الطعام تقرف) المهم، يجب أخيرا ان يكون اسم البراند معبر عن طبيعة المنتج ويسهل تذكره ونطقه وربطه بمنتجات هذا البراند، وبالإضافة الي الاسم يكون لكل براند لوجو خاص به يحمل الوانه والشكل المعبر عنه بحيث يسهل التعرف علي منتجاته.

قيمة البراند

ارتباط البراند عند المتسوقين بقيمة معينة هو الهدف الذي تسعي الشركة اليه دائما، مثلا براند سعره منخفض ومنتجاته جيدة، او سعر متوسط لكن المنتجات جديدة دائما، او سعر مرتفع وخامات راقية وهكذا يجب ان يكون لكل علامة تجارية مكان محدد في السوق يمثل شخصية البراند ولهذا تحاول السيطرة عليه. وتزداد قيمة البراند باستمرار مع نجاحه في تحقيق هذه المعادلة ومع ثقة الناس فيه، وكذلك تقل قيمته بشدة عند فشله في تحقيق وعوده في السوق، كلمة شخصية البراند مصطلح يقصد به الشخص النموذجي الذي تسعي هذه العلامة الي تلبيسه، انا ممكن أقول مثلا ان دي براند شقية يبقي الملابس التي تنتجها كلها ستكون في نفس هذا الاتجاه، وكذلك أيضا ستكون شخصيات المتسوقين الذين يشترون من هذا البراند.

تحدث 20% جيدا عن التجارب الجيدة في المحلات، ويتحدث 80% سلبيا عند وجود تجارب سيئة.

بالمناسبة اغلي براند أزياء في العالم هو لويس فيتون Louis Vuitton وقيمته 41.1 مليار دولار طبعا اعلي من زارا واديداس وجوشي وغيرهم، وهي البراند رقم 26 علي مستوي العالم،

حماية براند الملابس

في صناعة الملابس يعتبر البراند واحد من اهم اساسيات العمل في هذه الصناعة (انا عارف ان السوق مش بيعمل كده، لكن هما احرار)، ولهذا يجب حماية علامات الملابس التجارية من خلال توثيقها في وزارة الصناعة، بحيث لا يمكن لأي شخص استخدام نفس الاسم او اللوجو، ويمكن تحميل نموذج طلب تسجيل علامة تجارية وتقديمه في وزارة الصناعة، وتكلفة التسجيل تقريبا 60 جنيه (والله اعلم).

الحديث عن العلامات التجارية في صناعة الملابس واسع وممتد لكن هذه الموضوع هو مجرد نبذة بسيطة عنه لمساعدة كل من يسعي الي انشاء براند الملابس الخاص به.

الكاتب: خالد الشيخ

avatar
مصمم ازياء مصري حاصل علي درجة الدكتوراة في تصميم الازياء، واعمل مدرس (دكتور) بكلية الفنون التطبيقية- جامعة حلوان- قسم الملابس، اكتب هنا في موقع فاشونايد، واعتبره ساحة للحوار المتبادل مع المهتمين بهذه الصناعة حول كل ما يخص تصميم وتصنيع الملابس والازياء.
15 تعليق علي الموضوع
  1. يقول عزيزة عزام:

    انا ورشة صغيرة لكنى ينفذ اى موديل خبرتى حوالى٨سنوات ف شركة ديبولت انتر ناشيونال..وكنت مشرفة خط انتاج كامل..تخصصى كان بولو وبيزك وسروال ..نفسي اعمل شغل لنفسي لكن مش عارفة..بصنع لغيرى وبأقل التكاليف وباعلى جودة.ارجو النصيحة..وشكرا

  2. يقول احمد سامح:

    سلام عليكم ورحمه الله وبركاته… اولا بشكر حضرتك علي المعلومات القيمة.
    انا هبدأ إن شاء الله تصنيع تيشيرتات للصيف رجالي برقبه وبولو، اتمني لو حضرتك تقدر تدلني علي مكان تصنيع للتيشيرتات بجوده كويسةو سعر مناسب و يكون شغله مضمون واحترافي وسواء انا اجيب القماش او هما ؟ اي حد حضرتك ترشحه بحكم خبرتك ولو حتي حضرتك تدلني علي صفحه علي النت او رقمه او عنوانه وانا اتواصل معاه. ابقي شاكر لحضرتك جدا

    1. يقول خالد الشيخ:

      جربي هذه الصفحة تصنيع الملابس للغير فيها اسماء مصانع كتير

  3. يقول aya:

    شكرا مقاله حضرتك مفيده جدا
    لو سمحت حابة اعمل براند للطرح (للحجاب /بندانات )
    ابداء ازاى من حيث التصنيع اروح مصانع ملابس ولا مشغل واتفق ع الكمية ولا اروح مصنع للصناعة الطرح لكن خايفة ياخد الفكرة بتاعتى ينتجها باسمة حضرتك رايك اية
    وهل بيكون فى اجراءات قانونية فى مصر من ورق بعملة فى الاول ولا اية
    وشكرا مقدما

    1. يقول خالد الشيخ:

      الاجراء القانوني هو تسجيل علامة تجارية باسمك وتوثيق تصميماتك تحت مظلة العلامة التجارية.
      لكن الاهم هو انك تحمي شغلك لانه في جميع الاحوال هيتقلد، والفكرة مش انك تمنعي التقليد تماما لان ده مش ممكن، لكن الفكرة انك تحمي تصميماتك الجديدة لفترة من الوقت كافية انك تكسبي منها.
      في بداية مشوارك جربي تصنعي كمية قليلة من تصميمات مش جديدة اوي لحد ما تتعرفي علي المصانع واسلوب العمل معاهم، وبعدين كملي شغل مع المصانع اللي تثقي فيها، يعد كده ممكن تبتدي تصنعي بنفسك.

  4. يقول ميرفت سعد:

    السلام عليكم
    انا ببدأ مشروعي في مجال الملابس الكاجوال للمحجبات واريد نصائح من حضرتك بدايه كيفية التسعير وايضا كيفية التعامل مع الورش

    1. يقول خالد الشيخ:

      التسعير له اساليب كير ابسطها حساب التكلفة واضافة هامش ربح.
      التعامل مع الورش بيكون بالاتفاق علي كمية الانتاج ومستوي الجودة والتكلفة.
      التكلفة ممكن تكون تكلفة اتشغيل فقط لو حضرتك هتديله الباترون والقماش، وممكن كمان تديله القماش مقصوص وهو يخيطه فقط.
      وممكن تكون التكلفة شاملة للباترون والقص والخياطة، وعلي حسب موعد ومكان التسليم وهكذا…

  5. يقول هديل:

    السلام عليكم
    استاذ خالد ممكن وسيلة تواصل لحضرتك
    على الخاص

    1. يقول خالد الشيخ:

      الايميل khaled @ fashionied.com

  6. يقول حسين فرحات:

    السلام عليكم
    أولا فعلاً أنا بشكر حضرتك على المقالات الرأئعه
    إحنا بفضل الله اسسنا مصنع ملابس بيتى حريمى وبفضل الله بنراعى ربنا في المنتج والخامات والسعر على المستهلك ودلوقتي إحنا كبيرنا شويه في خلال السنه اللي فاتت عاوز اجيب سيستم يشتغل عليه كل مراحل التصنيع ومن خلاله أقدر اضبط الاداء لجميع العاملين
    بالإضافة أنى كنت بدير بنفسى ودلوقتي أنا هجيب مدير وعاوز أعمل تخطيط الهيكل التنظيمي للمراحل كلها ياريت لو حضرتك تقدر توجهنى اكون شاكر لحضرتك

    1. يقول خالد الشيخ:

      مش فاهم تقصد سيستم ايه بالظبط.
      لكن تخطيط عمليات التصنيع ولهيكل الاداري الاتنين بيتعملوا علي الوورد والاكسل. ما شفتش حد عملهم علي برنامج ونفعت.

  7. يقول ايمان:

    شكرا على مقالات حضرتك
    تقريبا الوحيدة اللي بتتكلم بتفاصيل كدا عن مجال الازياء
    انا باسس لبراند حاليا لكن مشكلتي اني مش لاقية منفذين كويسين ، يعني اما بسعر تنفيذ وعمالة قليل بس تنفيذ سيء جدا او مبيعرفوش ينفذوا اصلا لان تصميمياتي مختلفة ومش متعودين عليها وعلى باتروناتها ، اما بلجأ لمؤسسة تكلفتها عالية بداية من الباترون لسعر الخياطة ودا هيزود جدا سعر القطعة وانا مكانش هدفي اني انزل بحاجة غالية للدرجادي ، هدفي كان سعر متوسط وتصميم جميل وجديد ومميز
    هل اجازف واشتغل على السعر العالي وخلاص واغير هدفي اني اتارجت class A مثلا ؟ ولا في حلول تانية حضرتك ممكن تقترحها عليّ ؟

    1. يقول خالد الشيخ:

      شكرا علي رأيك واتمني تكون المقالات افادتك.
      حضرتك محتاجة تقدمي حاجة جديدة في السوق ده اهم نقطة لازم تركزي عليها.
      للاسف لو هتعتمدي علي الاخرين تماما في كر مراحل التصنيع لازم سعر القطعة يعلي جدا زي ما حضرتك بتقولي، وضروري انك تحاولي تعملي بعض هذه المراحل بنفسك لتخفيض التكلفة.

  8. يقول أماني حسين:

    السلام عليكم ورحمة الله
    أستاذ خالد
    أنا مصممة سعودية انتجت أكثر من كولكشن ، لدي عملاء واسم لكن أواجه مشكلة في الانتاج
    الخامات استوردها من الخارج
    والأيدي العاملة لدينا جدا صعبة ولاتليق بالخامات التي تكلفني الكثير
    أريد الاتجاه للانتاج في اوروبا
    وصناعة براند ملابس
    هل أجد لك مقالات أو دراسة جدوى بخصوص الموضوع
    وشكرا لك على عطاءك 🌷

    1. يقول خالد الشيخ:

      الانتاج في اوروبا فكرة غير جيدة، لاحظي ان العلامات التجارية الاوروبية نفسها تنتج في اسيا وافريقيا لتقليل التكاليف.
      جربي الانتاج في مصر او الهند او باكستان او الصين
      للاسف لا يمكنني مشاركة دراسات الجدوي عن السوق السعودي فكل دراسة تكون خاصة باصحابها

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

اعجبك الموقع؟

صفحتنا علي فيسبوك

تواصل معنا...

هل تبحث عن موضوع معين؟

اعضاء فاشونايد